En agosto de 2014 nace na cidade galega de Noia o que será o primeiro festival de arpa do noroeste ibérico. Créase coa intención de contribuír á difusión da utilización deste instrumento universal nos diferentes xéneros e estilos que conviven no amplo horizonte da música actual. As espectaculares arpas pétreas da arquivolta da igrexa de San Martiño, na praza principal da vila, serven de alegoría e inspiración para a consolidación ao longo do tempo dun certame peculiar que logra concitar a atención de propios e estraños e que se conforma en base a actividades que implican tanto a profesionais como a estudantes e afeccionados en xeral, público que aprecia a personalidade sonora particularmente atractiva e suxerinte das diversas clases de arpas que ano tras ano desfilan polo festival.
Ao mesmo tempo realízanse en cada edición obradoiros e clases maxistrais destinados aos estudantes que se inscriben cada ano procedentes de diversos puntos de España.
As manifestacións artísticas que, en forma de música para arpa caracterizan geografias de tres continentes, achegan cada ano unha enorme diversidade cultural que é reunida e exhibida nos distintos recintos do festival.
O público infantil ten tamén o seu lugar nos concertos especialmente encargados cada ano a un artista especializado en difundir a música de arpa entre os máis pequenos.
Os luthieres que o desexan teñen no Noia Harp Fest un espazo de exposición intercambio de ideas aberto ao público visitante.